Apple "iOS 27.3" ilə "iCloud"un ictimai linklərini zərərli məzmuna görə yoxlayacaq

"Anyone with the link" seçimi ilə paylaşılan fotolar və fayllar şirkətin nəzarətindən keçəcək, qayda pozuntusu hesabın bloklanması ilə nəticələnə bilər.

9to5Mac xəbər verir ki, "Apple" "iOS 27.3" yeniləməsindən başlayaraq "iCloud" vasitəsilə yaradılan ictimai linkləri zərərli məzmuna görə yoxlamağa başlayacaq. Bu barədə məlumat şirkətin saytında dərc olunan yeni dəstək sənədində yer alıb.

Hazırda "iCloud"da saxlanılan foto və faylları iki üsulla paylaşmaq mümkündür: yalnız seçilmiş şəxslərlə ("People you choose") və ya linki olan hər kəslə ("Anyone with the link"). Dəyişiklik məhz ikinci seçimə aiddir və "iOS", "iPadOS", "macOS" və "visionOS" əməliyyat sistemlərinin 27.3 və sonrakı versiyalarında qüvvəyə minəcək.

Sənədə görə, paylaşılan məzmun zərərli kimi qiymətləndirilərsə, "Apple" onu istənilən vaxt köçürmək, rədd etmək, dəyişdirmək və ya silmək hüququnu özündə saxlayır. Belə məzmun yükləməyə çalışan istifadəçilərin "Apple Account" hesabı bloklana, eyni e-poçt ünvanı və ya telefon nömrəsi ilə yeni hesab yaratmaq imkanı məhdudlaşdırıla, zərurət olduqda isə hüquq-mühafizə orqanları işə cəlb oluna bilər.

Şirkət xatırladır ki, ictimai link əvvəldən də "Apple" daxil olmaqla linki olan hər kəs üçün əlçatan olub. Yeni olan isə bu linklərin artıq zərərli məzmuna görə yoxlanılmasıdır.

Qeyd edək ki, "Apple" bu həftə "iOS 27.3"ün ilk beta versiyasını təqdim edib. Yeniləməyə "Siri" üçün süni intellekt təkmilləşdirmələri, "Safari" brauzerində yeni funksiyalar və tamamilə yenilənmiş "Apple Health" tətbiqi daxildir.

Mənbə: 9to5Mac