Apple ilk dəfə "MacBook Pro"ya sensor ekran və OLED texnologiyası gətirib

Şirkət illərdir smartfon və planşetlərdə istifadə etdiyi sensor idarəetməni nəhayət noutbuklarına da tətbiq edib.

Tom's Hardware xəbər verir ki, "Apple" keçən həftə "MacBook Pro" noutbuklarına iki yeni ekran texnologiyası gətirib: OLED panel və sensor idarəetmə. Bununla da şirkətin noutbuk xəttində ilk dəfə sensor ekran meydana çıxıb.

Nəşrin yazdığına görə, OLED texnologiyasının "MacBook"lara gəlişi yalnız zaman məsələsi idi. "Apple" bu tip ekranlardan uzun illərdir "iPhone" smartfonlarında və "Apple Watch" ağıllı saatlarında istifadə edir, bu yaxınlarda isə onu "iPad Mini" planşetinə də gətirib.

Sensor ekran isə şirkət üçün heç vaxt qaçılmaz addım kimi görünməyib. "Apple"ın ən uğurlu məhsullarının bir çoxu, o cümlədən "iPhone", "iPad", "Apple Watch" və sonrakı nəsil "iPod" pleyerləri sensor idarəetməyə əsaslansa da, bu texnologiya indiyədək şirkətin noutbuklarında tətbiq olunmayıb.

Qeyd edək ki, "Apple"ın həmtəsisçisi Stiv Cobs hələ 2010-cu ildə noutbuklarda sensor ekran ideyasına skeptik yanaşdığını açıq şəkildə bildirmişdi. Şirkət uzun illər bu mövqeyə sadiq qalıb və "Mac" kompüterlərində əsas idarəetmə vasitəsi kimi klaviatura və trekpada üstünlük verib.

Mənbə: Tom's Hardware