Amazon yeni "Echo Time" ağıllı saatını təqdim edib: qiyməti 199,99 dollardır

Dəyirmi ekranlı yeni cihaz "Alexa+" ilə ağıllı evi idarə edə, səs-küy maşını kimi işləyə və musiqi səsləndirə bilir.

Mashable xəbər verir ki, "Amazon" yeni "Echo" cihazları sırasında "Echo Time" adlı ağıllı zəngli saat təqdim edib. Cihazın qiyməti 199,99 dollar müəyyənləşdirilib.

"Echo Time" 3,2 düymlük dairəvi sensor ekrana malikdir və istifadəçilər üçün yüzlərlə saat görünüşü təklif edir. Süni intellektə əsaslanan "Alexa+" vasitəsilə cihazla ağıllı işıqları idarə etmək, yuxu üçün temperaturu tənzimləmək və ya pərdələri açmaq mümkündür.

Saat həmçinin səs-küy maşını funksiyasını yerinə yetirir: yuxuya getmə və ya meditasiya zamanı sakitləşdirici səslər səsləndirir. Şirkətin sözlərinə görə, daxili dinamik musiqi üçün itkisiz yüksək keyfiyyətli səs təmin edir. Cihazda mikrofonları söndürmək üçün düymə də daxil olmaqla, bir neçə səviyyəli məxfilik nəzarəti var.

"Echo Time" qrafit, mərcan çəhrayı və buzlaq ağ rənglərində satışa çıxarılıb, ona uyğun əlavə dayaq da təklif olunur. Uşaqlar üçün nəzərdə tutulmuş versiya da mövcuddur.

Qeyd edək ki, "Amazon"un əvvəlki ağıllı zəngli saatı "Echo Spot" 79,99 dollara satılırdı, lakin avqustda onun qiyməti 109,99 dollara qaldırılıb. Mashable texnologiya şirkətlərinin süni intellekt sənayesinin yaratdığı yaddaş çatışmazlığı səbəbindən artan xərcləri qiymətlərə əlavə etdiyini bildirib.

Mənbə: Mashable