SpaceX NASA və Pentaqonla yeni müqavilələrdən imtina etməyə başlayıb

Şirkət gələcək gəlirlərini əsasən süni intellektlə bağlayır, ABŞ kosmik agentliyi isə alternativ axtarmalı olur.

Ars Technica xəbər verir ki, "SpaceX" ABŞ hökuməti ilə kosmik uçuş xidmətləri üzrə yeni böyük müqavilələr bağlamaqdan getdikcə daha çox imtina edir. Şirkət mövcud öhdəliklərini yerinə yetirməyə davam etsə də, prioritetlərini süni intellekt sahəsinə yönəldib.

Məlumata görə, "SpaceX" NASA-ya astronavtları Beynəlxalq Kosmik Stansiyaya daşıyan "Crew Dragon" kapsulunun uçuşlarını 2030-cu ilə qədər və ya daha əvvəl dayandıracağını bildirib. Şirkətin prezidenti Gwynne Shotwell NASA-nın bu məqsədlə "Boeing"ə üz tutmalı olduğunu deyib. Bundan əlavə, "SpaceX" 2028-ci ildən sonrakı missiyalar üçün "Falcon 9" raketində kommersiya buraxılışlarının satışını dayandırıb.

"Politico"nun yazdığına görə, şirkət ABŞ Kosmik Qüvvələrinə 2020-ci illərin sonu üçün nəzərdə tutulan üç yeni buraxılış müqaviləsi üzrə təklif verməyəcəyini bildirib. Həmçinin "SpaceX" NASA-nın Ay proqramı çərçivəsində kiçik eniş aparatları hazırlayan şirkətlərə buraxılış xidməti göstərməyəcəyini açıqlayıb.

Mənbəyə görə, bu dəyişiklik İlon Maskın süni intellekti dövrün əsas sənaye inqilabı kimi görməsi ilə bağlıdır. "SpaceX"in "xAI" şirkətini alması və ilkin kütləvi təklifə çıxması da bu strategiyanın bir hissəsidir.

Qeyd edək ki, son iki onillikdə NASA "SpaceX"ə təxminən 20 milyard dollar dəyərində müqavilələr verib. 2008-ci ildə imzalanan 1,6 milyard dollarlıq yük daşıma müqaviləsinin şirkəti iflasdan xilas etdiyi bildirilir. Hazırda NASA-nın "Artemis" proqramı və Beynəlxalq Kosmik Stansiya ilə bağlı fəaliyyəti böyük ölçüdə "SpaceX"dən asılıdır.

Mənbə: Ars Technica