NASA "Orion" kosmik gəmisinin uzun illər həll olunmayan problemini aradan qaldırır

Agentlik "United Launch Alliance" ilə birlikdə gəminin Aya daha yaxın orbitə çıxmasına imkan verəcək yeni yuxarı pillə hazırlayır.

Ars Technica xəbər verir ki, NASA Aya eniş missiyaları üçün planlarını yeniləyib və "Orion" kosmik gəmisi ilə bağlı uzun müddət həllini tapmayan problemi aradan qaldırmaq qərarına gəlib. Agentlik "United Launch Alliance" şirkəti ilə birlikdə "Centaur V" yuxarı pilləsinin "genişləndirilmiş" versiyasını hazırlayır.

NASA-nın paylaşdığı sxemə görə, "Orion" "Blue Moon" eniş aparatı ilə Ay səthindən təxminən 8500 kilometr yüksəklikdəki elliptik orbitdə birləşməlidir. Lakin agentlik birləşmənin səthdən bir neçə yüz kilometr hündürlükdəki aşağı Ay orbitində həyata keçirilməsi variantı üzərində də çalışır.

"Artemis" proqramının meneceri Jeremy Parsons bildirib ki, aşağı orbit "Blue Moon" aparatının astronavtları səthə endirib geri qaldırması üçün lazım olan yanacağın həcmini xeyli azaldacaq. Bundan əlavə, belə orbit zərurət yarandıqda astronavtların Aydan daha tez ayrılması üçün daha çox imkan yaradır.

Yeni yuxarı pillə "Space Launch System" raketinin əsas pilləsi ilə birlikdə "Orion"un aşağı Ay orbitinə çatmasını təmin edəcək. NASA rəhbəri Jared Isaacman qeyd edib ki, bu, çox uzun müddət diqqətdən kənarda qalan mühərrik və gəmi inteqrasiyası problemlərinin həlli deməkdir.

Qeyd edək ki, "Orion"un xidmət modulu gəminin Yerdən uçaraq aşağı Ay orbitinə çatması və geri qayıtması üçün kifayət qədər güclü deyildi. Bu səbəbdən NASA əvvəllər "Orion"un təhlükəsiz çata biləcəyi orbitdə yerləşən "Lunar Gateway" stansiyası kimi alternativ həllərə üz tutmuş, əsas yükü isə eniş aparatlarını hazırlayan şirkətlərin üzərinə qoymuşdu.

Mənbə: Ars Technica