Alman startapı "Orbital Matter" kosmosda ilk dəfə 3D çapla sərt tir hazırlayıb

"Replicator-2" peyki orbitdə yarım metrlik plastik tir çap edib. Texnologiya gələcəkdə böyük kosmik strukturların qurulmasına imkan verə bilər.

TechCrunch xəbər verir ki, alman startapı "Orbital Matter"in peyki orbitdə xüsusi plastik materialdan yarım metr uzunluğunda sərt tir çap edib. Şirkət rəhbərlərinin sözlərinə görə, bu, sərbəst uçan kosmik aparat üçün bir ilkdir.

"Replicator-2" adlı kiçik peyk bu yay "SpaceX"in birgə buraxılış missiyası ilə orbitə çıxarılıb və bortunda şirkətin dörd 3D printeri yerləşdirilib. Printerlər ultrabənövşəyi işıqla bərkiyən qatran halqalarından silindrik tir yaradır. Printerlərdən ikisi çevik günəş panelini açmaq üçün nəzərdə tutulub, onlardan biri nasazlıq səbəbindən sıradan çıxsa da, yaradılan tir günəş panelini uğurla açıb.

Mütəxəssislərin fikrincə, texnologiya gələcəyin daha çox enerji tələb edən və daha çox istilik yayan kosmik aparatları, xüsusilə orbital məlumat mərkəzləri üçün vacibdir. Şirkətin baş direktoru Yakub Stoyek bildirib ki, "Replicator-2" panelləri kosmosda missiyanın tələb etdiyi istənilən ölçüdə qurmağın mümkün olduğunu sübut edib. Mühəndislər 100 metrlik tirlərin də mümkün olduğunu düşünürlər.

"Orbital Matter" 2028-ci ildə daha böyük printerin sınaqdan keçiriləcəyi yeni missiya planlaşdırır. Həmin missiyada 5 kVt enerji istehsal edən günəş panelinin açılması gözlənilir, 2030-cu ilədək isə hər qanad üçün 100 kVt-dan çox gücə çatmaq hədəflənir.

Qeyd edək ki, şirkət 2022-ci ildə təsis edilib və 3 milyon dollar başlanğıc investisiya cəlb edib. Müqayisə üçün, "SpaceX"in "Starlink V2" peyklərinin günəş panelləri 20 metr uzunluğundadır. Daha əvvəl mikroqravitasiyada 3D çap yalnız Beynəlxalq Kosmik Stansiyanın təzyiqli mühitində həyata keçirilib.

Mənbə: TechCrunch