"Tesla" üçüncü rübün nəticələrini açıqlayıb: gəlir artmayıb, xərclər yüksəlib

Şirkətin avtomobil və enerji bölmələrinin gəlirləri azalıb, kapital xərcləri isə bir il ərzində iki dəfədən çox artıb.

The Verge xəbər verir ki, "Tesla" 2026-cı ilin sentyabrında başa çatan üçüncü rüb üzrə maliyyə hesabatını açıqlayıb. Şirkət 28 milyard dollar gəlir və 1,7 milyard dollar xalis mənfəət əldə edib. Gəlir ötən ilin eyni dövründəki 28,1 milyard dollar səviyyəsində qalıb, lakin Wall Street-in 27,9 milyard dollarlıq proqnozunu üstələyib.

Avtomobil satışından gələn gəlir illik müqayisədə 3 faiz azalaraq 20,5 milyard dollar olub. Enerji istehsalı və saxlanması bölməsinin gəliri isə 16 faiz düşərək 2,9 milyard dollara enib. Elektromobillərin şarj edilməsi, texniki xidmət, ehtiyat hissələri və sığortanı əhatə edən xidmətlər seqmenti isə 33 faiz artımla 4,6 milyard dollar gəlir gətirib.

Şirkətin kapital xərcləri 110 faiz artaraq 4,7 milyard dollara çatıb. "Tesla" süni intellekt, avtonom avtomobillər və robototexnikaya sərmayə qoymağa davam edir. İlon Mask bu il ən azı 25 milyard dollar kapital xərci gözlənildiyini bildirsə də, ilin ilk üç rübündə cəmi 13 milyard dollar xərclənib. Əməliyyat gəliri isə 56 faiz azalaraq 718 milyon dollar olub.

Qeyd edək ki, rüb ərzində "Tesla" müştərilərə çatdırılmaları 2,1 faiz azalıb. Bu, 30 sentyabr 2025-ci ildə elektromobillər üçün 7 500 dollarlıq federal vergi güzəştinin başa çatması ilə əlaqələndirilir. Həmçinin bu rübdə yeni nəsil "Roadster"in prototipi Texasda nümayiş olunub, Mask isə "Tesla" ilə "SpaceX"in birləşməsi imkanını müzakirə etmək üçün xüsusi komitələrin yaradıldığını açıqlayıb.

Mənbə: The Verge